जोहार छत्तीसगढ़ पार्टी डहर ले गणतंत्र दिवस के गाड़ा-गाड़ा बधाई, प्रदेश महामंत्री सुरेंद्र राठौर (सोनू भैया) ह दीस सुग्घर संदेश ।

प्रमोद कुमार बंजारे संभाग ब्यूरो चीफ

कोरबा ( सुघर गांव )। जिला के कटघोरा ब्लॉक के रहैया जोहार छत्तीसगढ़ पार्टी के प्रदेश महामंत्री सुरेंद्र राठौर (सोनू भैया) हर बताइस आज पूरा देश म 77वां गणतंत्र दिवस (26 जनवरी 2026) के तिहार बड़े उत्साह अउ उमंग के संग मनाय जात हे। ए उपलक्ष्य म जोहार छत्तीसगढ़ पार्टी के प्रदेश महामंत्री सुरेंद्र राठौर (सोनू भैया) ह समस्त प्रदेशवासी अउ देशवासी मन ल गणतंत्र दिवस के गाड़ा-गाड़ा बधाई अउ शुभकामना दीस हे। अपन शुभकामना संदेश म सोनू भैया ह कहिन कि— "गणतंत्र दिवस हमर लोकतंत्र के मान अउ सम्मान के परब आय। ये दिन हमन ल उन वीर बलिदानी मन के सुरता कराथे, जेकर बदौलत आज हमन एक आजाद अउ लोकतांत्रिक देश म सांस लेवत हन। हमर छत्तीसगढ़ के माटी ह हमेशा ले न्याय अउ अधिकार बर लड़इया मनखे मन के माटी रिहिस हे।" उमन आगे कहिन कि जोहार छत्तीसगढ़ पार्टी ह छत्तीसगढ़िया मन के मान-सम्मान अउ हक बर हमेशा खड़े हे। हमर संकल्प हे कि हमर प्रदेश म खुशहाली आय, नवा पीढ़ी ल रोजगार मिलय अउ हमर पुरखा मन के देखे सपना साकार होवय। सुरेंद्र राठौर जी ह प्रदेश के जम्मो किसान,जवान,भाई-बहिनी, युवा अउ सियान मन ल जोहार कहत हुए अपील करीन कि आओ, हमन मिलके अपन छत्तीसगढ़ ल अउ मजबूत बनावन अउ देश के विकास म अपन योगदान देवन।

जम्मो प्रदेशवासी मन ल गणतंत्र दिवस के गाड़ा-गाड़ा बधाई ! 🇮🇳

आओ, आज के दिन हमन संकल्प लेवन कि अपन छत्तीसगढ़ी संस्कृति अउ अस्मिता ल बचाए बर हमन हमेशा एकजुट रहिबो।

          सुरेंद्र राठौर (सोनू भैया)

 प्रदेश महामंत्री, जोहार छत्तीसगढ़ पार्टी