उत्साह के घोड़ा सरपट दौड़िस: दिव्यांग नान-दउहरा मन दिखाइन कमाल

उत्साह के घोड़ा सरपट दौड़िस: दिव्यांग नान-दउहरा मन दिखाइन कमाल

जांजगीर चांपा (सुघर गांव)। 07 दिसंबर 2025,

विश्व दिव्यांग दिवस  के मौका मं जांजगीर मं समग्र शिक्षा अउ समाज कल्याण विभाग के संग-जोत म जिला स्तरीय खेलकूद अउ सांस्कृतिक प्रतियोगिता कराय गे। पांचों विकासखण्ड ले आय दिव्यांग नान-बाका अपन जोश-जुनून ले पूरा मैदान अउ मंच ला चमका दीन।अकलतरा विकासखण्ड ले 20 गो सहभागी पहुंचे अऊ सबो झन बढ़िया प्रदर्शन करिन। प्राथमिक शाला परसाही बाना के अल्प दृष्टिबाधित उमंग कंवर मिश्रित मोती प्रतियोगिता मं दूसर स्थान पाइन। शाला तागा के श्रवण बाधित मुस्कान भैंना 100 मीटर दौड़ म सबला पछाड़त पहिली स्थान म रहीन। प्रा.शाला बनाहिल के कुमारी संध्या जलेबी दौड़ अउ 50 मीटर मं दूसर,अउ 100 मीटर मं पहिली आय के अपने जबरदस्त फॉर्म दिखाइन। प्राथमिक शाला बुचिहरदी के दृष्टिबाधित अरुण कुमार मटका फोड़ मं दूसर,अउ पूर्ण दृष्टिबाधित रितिका मिश्रित मोती अलग करे मं तीसर स्थान पाइन। माध्यमिक स्तर महा.से.अकलतरा के हर्ष कंवर 100 मीटर दौड़ के चैंपियन बनिन। प्राथमिक तागा के अल्प दृष्टिबाधित सरोज कुमार मटका फोड़ अउ भाषण—दूनों मं पहिली स्थान लेके सबके मन जीते। आर.के.स्कूल के साहिल कुमार 100 मीटर मं दूसर स्थान पाइन। सांस्कृतिक मंच म उमेश कुमार, सृष्टि साहू, अनन्या केवट, साधना रात्रि, राधा यादव, श्रुति चौहान अउ नेहा कंवर अपन जबरदस्त नाच-गान ले सबके मन मोह लीस। एम.एस.अमरताल के कल्पना, संजना,अनसूया अउ रचना समूह नृत्य म खूब तालियां बटोरिन। कार्यक्रम म जिला परियोजना कार्यालय अउ समाज कल्याण विभाग के अधिकारी-कर्मचारी संग बीइओ देवकांत द्विवेदी, अकलतरा ले शैलेंद्र सिंह,वरिष्ठ बीआरपी अंजना घोष, स्पेशल एजुकेटर रामकली शांते अउ रानू श्रीवास, तथा एम.एस. अमरताल के अरुणा मीरी सामिल होके नान-नान लइकन मन ला हौसला बढ़ाइन।