प्रशांत सिंह संभागीय अधिमान्य पत्रकार समिति म बनिन प्रतिनिधि,जिला भर म खुशी के माहौल

प्रशांत सिंह संभागीय अधिमान्य पत्रकार समिति म बनिन प्रतिनिधि,जिला भर म खुशी के माहौल

  जांजगीर - चांपा (सुघर गांव)। 22 नवंबर 2025,

जिला के प्रसिद्ध 24 न्यूज़ चैनल के सक्रिय पत्रकार प्रशांत सिंह के नाम संभागीय अधिमान्य पत्रकार समिति म शामिल कर ले गे हवय। ए बेरा म जिला जनसम्पर्क अधिकारी जरीफ खान हर राजपत्र म प्रकाशित समिति गठित करे बर जारी पत्रक ला 21 नवंबर के औपचारिक रूप ले पत्रकार प्रशांत सिंह के हाथ म सौंपिस। जिला ले एके झन पत्रकार के समिति म जगह मिले से जांजगीर - चांपा जिला के पत्रकार समुदाय म उत्साह अऊ खुशी के लहर दौड़ गे हवय। सबो पत्रकार संगी मन प्रशांत सिंह ला बधाई देत कहिन - “ये जिला जांजगीर - चांपा के पत्रकारिता बर गौरव के बात आय।”

प्रशांत सिंह अपन प्रतिक्रिया म कहिन -“संभागीय अधिमान्यता समिति म शामिल होए बड़े सम्मान के बात आय। अब मोर पूरा उदिम रहि के जिला के पत्रकार मन जे आवेदन करहि ओमन ला नियम के अनुरूप शासन ले मिलत अधिमान्यता दिलाय म हर संभव मदद करिहंव। पत्रकारिता के नेह - सत्य,समाजिक सरोकार अऊ जनसेवा ला और मजबूती देहे बर सरलग काम करत रहिहंव।”